رحله الى فرنسا

بسم الله الرحمن الرحيم

اليوم اتجهنا للأفطار ، بعدها نزلنا لمحطة القطار وحجزنا تذكرتين قطار ، درجة ثانيه متجهه لباريس بقيمة 258 فرنك للشخصين بعدها رحنا لشركة سكست للتأجير السيارات وادخل السيارة بالموقف والقى شخص وكنت أأشر له اني اوقفها هنا ، حسيت شكله عربي ، قلت الأخ عربي قال ايه ، قلت الحمد لله ميسره ، هاه وش اسوي بالسيارة ، قال خلاص وقفها هنا ، بس عبيتها فل بانزين ، قلت فل الا ربع ، قال على كيفك لكن هم ياخذون حساب البانزين ، قلت والله عجزان اروح ، قال خلاص تقدر تمشي ، قلت يعني مافيه اجراءات قال لا ، المكتب كان قريب من الفندق ، وقريب من البحيرة ، نزلنا للبحيره شوي نبي نودعها ، ونودع سويسرا الساحرة ، ورجعنا للفندق نجهز اغراضنا ، ونقعد نجرجر بهالشناط لمحطة القطار ، ونجلس بالمكان المخصص لرحلة باريس ،ويوم فتحو البوابه طلعنا فوق لأنتظار القطار ، وقبل نركب كان فيه جهاز ندخل التذكره فيه ويختم عليها ، بصراحه انا مع هالناس شفتهم يدخلون قلت يالله معهم ، والله مادري لوهي الغاء حجز هههههه ، المهم يوم وقف القطار ونركب العربة الي قدامنا ، نحسب الدعوى سبقي (يعني مسابق) ، المهم فيه مكان للشنط الكبيره ، وكان فيه شباب ساعدوني على شيل الشناط ، رحمو حالتي انا وهالي معي جلسنا حسب الرقم ، لكن شكيت بمكاننا وأسأل وحده ورانا قالت لالا هذي ماهي عربتكم ، وننقز نبي ننزل وانسى الشناط الصغيره فوق المقعد ، ونرجع ناخذهن ، قالت اصبرو لاتنزلون القطار يبي يمشي ، المهم قلت القطار يروح لباريس قالت ايه ، قلت خلاص ، المهم جو ناس نفس مقعدنا ، واشوى الي ورانا قالت لهم روح اجلسو بأي مكان ، وينطلق القطار مع هالمناظر الطبيعية ، ويتوقف بمحطه وقلوبنا تدقدق من انه يجي احد مكاننا ، ويركبون ناس مكان الي حنا قاعدين مكانهم ، ولازالت الي ورانا ترتب هالناس بسببنا ، والله ياحنا حسناهم حوس بسبب اننا ماجلسنا بمكاننا الصحيح.





المهم وصلنا باريس ، كان يدور في راسي الأجرائات حقت دخول باريس(على باله انه داخل حدود الأردن) ، وننزل ويالله مع هالناس ، ويقابلنا مصري قال اهلين ياحاج ويمسك الشناط يبي يشيلهن بالعربه ، قلت خلهن انا اشيلهن قال لالا انا ياحاج ، قلت كم تاخذ قال الي تعطيني ، يوم شفت كذا قلت خلهن بس ، واتبع شارة تكسي ، لين طلعت برا المحطه ، مافيه لااجراءات ولاشي ، والقى سرى للحصول على تكسي ، وبصراحه نظام مميز ، حتى اذا وصلتو كان السرى على تكسي صغير يجيبون لك تكسي اكبر ، يعني ماتتعب ، المهم التكسي الي جانا مايعرف عربي ، واعطيه اسم النفدق وابلش مادري وش يقول ، لكن اشوى جاء سواق عربي ثاني وقعد يترجم بيني وبينه ، باريس فيها العرب كثير ، المهم اخر شي عرف مكان الفندق ، ونركب الشناط ونطلع معه.

وصلنا للفندق وخلصنا الإجراءات ، الفندق راااااائع وخدمتهم عاليه جداً ، واخذنا بجوله على الفندق للتعرف على اجزائه ، طبعاً كان يتحدث باللغة الفرنسية ، وانا اهز راسي اوكيه اوكيه ، والله مافهمت منه ولا كلمه ، لكن عرفت الأماكن ، يعني اللوبي والمطعم والمصعد ، طلعنا للغرفة وريحنا شوي وصلينا الظهر والعصر



وننزل لشارع الشانزليزيه طبعاً الشوق لايوصف ، لهذا الشارع الي سمعنا عنه الكثير، ولا العالم بحر ، من كل جنس ، والقوس قريب منا (قوس النصر) ، ونتمشى حوله نستكشف المنطقة ، ونلقى حيبي القلب ماكدونالدز ، وناخذ وجبتين تشكن برجر بـ12 فرنك ، ونطلع لبرج ايفل ماقدرت اصبر لين بكرى ، وهو ماهو بعيد عنا ، ويالله يوم طلع علينا من احد الشوارع ، ماحسبت انه ضخم كذا ، ولا نلقى العالم تحته بأعداد كبيره ، وهالأفارقه فيه معهم بظاعات للبيع ، ونجلس تحته نشوف للي رايح والي جاي ، بشر اشكال واجناس ، المكان تحت البرج مليان من الأحداث الي يبيع والي يتمشى ، بعدها رجعنا لشارعنا الشانزليزيه ، ونجلس بأحد المقاهي المنتشره على الشارع ، وبصراحه غاااااااااااااليه مره ، تذكرت شارع السوليدير بلبنان ، بس تجلس تراعي ويصير راسك تقل الة كاتبه يمين يسار ، وطبعاً عادتنا يالعرب ولا هم ماتلقى الي يراعي لك ، الخليجيين كانو بكثره بباريس ، عكس المناطق الي زرناها قبل.














ونرجع نريح بالفندق للنوم ، نبي نستكشف السحر الباريسي ..

موضوع رائع جدا

تسلم الاياااااااااااااادى

تسلمى يا قمراية
موضوع غاية فى الروعة والإبداع


لا تحرمينا من روعة مواضيعِكـ


ننتظر المزيد بشوق


<>< ودى ><>

دمتى مبدعة يا قمر

يسلمووووووووووو حببتى

تسلمى ياقمر